قصة شاب أحب استاذة الرياضيات

• قصة شاب أحب استاذة الرياضيات

جات جديدة وعجبتني بزاف وانا طويل كانوا يقراو دخلت قاتلي تفضل قلتلها جيت نمركي الغيابات قاتلي معليش ههه رجعت لبلاستي في الخير وجمعت قاتلي كملت قلتلها جيت نقرا يااستاذة ضحكتلي وبدات تشرح في الدرس وانا غير نكحل هههه فاتت الحصة بالخف كي جيت خارج قاتلي الحصة الجاية جيب كراس تاعك ماتجيش تحوس هنا قلتلها ما تخافيش يا استاذة نجيب الكراس و نغلفو بالاحمر تعبيرا للحب تاعي قاتلي واش من حب قلتلها الحب تاعي لمادة الرياضيات بدات تضحك قاتلي ان شاء الله تكون صح واش راك تحكي قلتلها شوفي استاذة انا حبيت نطلب منك حاجة قاتلي واش  قلتلها انا ناقص شوفة و حاب نريح فالطاولة الاولى باش نشوف مليح قاتلي ساهل نحكي مع الزملاء تاعك يخلوللك المكان ههه من نيتها مسكينة و انا غير باش نولي نشوفها عن قرب .غدوة من هاذااك رحت و قفت عند الباب ندخل ولا لا اواه ما ندخلش تكون الكلاسة ساكتة و ننفضح درت الكوراج و دخلت وقفت قدام الباب وقلت صباح الخير عليكم قاتلي مرحبا يا هلال العيد قلتلها الله يسلمك يا شمس الربيع بداو يضحكو عليا (خاطيهم الرمنسية الله غالب )

هنا بدات التحضيرات للخطة الجاية قلت ما عليش نصبر مالازمش نزرب رحتلها غير بالعقل كنت نفهم شوية و بديت بالمشاركة تلميذ مجتهد يا جدك ههه رجعت هي تشكرني و تحبني و انا نحضر غير الحصة تاعها و حد النهار و انا نلم في ادواتي باش نزرطي حتى جات ليا قاتلي وين بيها قلتلها نشم الهوا برك قاتلي ارواح تلقاني برا  انا وجهي رجع حمر خرجت لقيتها عند باب تستنى قاتلي واش بيك عبد الرحمان تقرى غير الحصة نتاع الرياضيات كاش ما عندك مشكل معا اساتذة الاخرين قلتلها لا لا برك نحب نقراى الرياضيات حاس روحي ضعيف فيها  قاتلي لا بالعكس راك مليح فالرياضيات و اذا كاش ما خصك تلقاني فالمكتبة وقت الاستراحة تاع 12

هبطت للمكتبة وقفت عند الباب تاع المكتبة شافو معايا كامل الاساتذة قلتلهم سلام عليكم قالي استاذ مانعرفوش واش خصك ياولدي قتلو راني نحوس على استاذة نتاع الرياضيات (في قلبي راني نحوس على لي عشقتني) قالي كاين بزاف تاع رياضيات واش لقبها قتلو هاذيك الصغيرة الشابة بداو يضحكو عليا قالولي راحت ضرك تجي ايا بقيت نستنى فيها

جات الاستاذة وانا غير قلبي يخبط (علاش عليك حاطة راسك وسيريو قد هاكذا)وصلت عندي وجات قعدت جنبي (ااااه ياربي هذا واش خصني) قاتلي ايه اعبد رحمان واش ما فهمتش قلتلها كنت فاهم كلش بصح كي شفتك ماراني فاهم والو قاتلي علاش واش صرا قلتلها لالا يعني حبيت نستغل الفرصة و نعاود نفهم كلش (مراوغة ناجحة ههههه)

قاتلي ماعليه نبداو بالعقل برك تفهم كلش و حاجة ما تخصك انا كنت حشمان وقلبي حاس بيه ماش قلبي عطاتني تمرين باش نحلو وانا من خلعة ما عرفتش نكتب وكنت نرجف (علاش راني نرجف زعما الحمة ) هي واش بيك هاكذا ديرني كيما اختك الكبيرة ما تحشمش مني ايه استاذة مرسي (اختي صارقالولك خصونا بنات فالدار) وبديت نحل ونغلط بالعاني باش تنحيلي ستيلو وتصححلي ومرة على مرة كي نكون نكتب تضربلي في يدي وتقولي غالط عاود (وانا اذا تبقاي تخبطيلي يدي والله غير ندورها فلسفة لا رياضيات لا والو )

ايا كي كملنا عطاتني حبة حلوة خبيتها وغدوة من هاذاك رجعت لنفس المكان و فهمتلي كي جينا خارجين قلتلها استاذة حبيت نسقسيك اذا ما تزعفيش قاتلي مانزعفش قول قلتلها السمانة لي فاتت شفت خاتم في يدك و ليوم ماكانش كاش ما طاحلك ولا ..... (انا ما شفت ما والو هههه) قاتلي لالا ماكانش خاتم قلتلها اوسبحان الله شفتو وباين تاع خطوبة قاتلي ماش مخطوبة وماش دايرة خاتم وهاذ الهدرة ماش داخلة فالقراية قلتلها ان شاء الله ربي يجيبني مكتوبم قالت امين (مافاقتش بلي قلت يجيبني هههه)

ايا أنا حسيت روحي كثرت عليها و دصرتني بزاف قلت والله ما نزيد نروح نشوف اذا تحوس عليا ولا راني غير نصمط في روحي ضربت سمانة مارحتش نقرا وصابر عليها (اااه يا قلبي ) حتى صونا تيليفون ألو شكون قالي أنا أسامة والاستاذة نتاع الرياضيات راهي تسقسي عليك أنا جمدت قتلو كاش فرض قالي لا لا حسباتك حبست وقاتلي قولو يجي يقرا مايلعبش بالمستقبل نتاعو (المستقبل بديت نلعب بيه نهار شفتك لعبتها نضححك وقتلو غدوا نجي.....

هبطت للمكتبة ولاعبها سيريو قعدنا فنفس الطاولة قلتلها استاذة والله غير اسمحيلي راني نتعب فيك بزاف قاتل غير انجح برك التعب تاعي يروح نهار النتائج قلتلها ان شاء الله ننجح ونجيبلك باتيسري 7ايتاج قاتلي روح برك فيك غير الزوخ وبدات تضحك معليش يا أستاذة ديري كيما تحبي فهمتلي الدرس لي تغيبتو وبدينا نقصرو خارج القراية نحكو على الحياة الشخصية وانا بسلامتي كنت حشمان قلتلها كي قريتي فالليسي واش هي الذكريات نتاوعك قاتلي الليسي يامات شابين و مايتعاودوش و كنت شاطرة كيما نتا قاتلي ونتا راك تخبي لي سوفونير قلتلها ايه يا أستاذة سن المراهقة وراكي تعرفي (وانا فالحقيقة خبت غير الحبة تاع الحلوة) قاتلي اخطيك من قصص نتاع الحب والتفاهات حط راسك في قرايتك خير ايه استاذة عندك الحق بصح الله غالب والله غير نحبك (ماش غير نحبك نعشقك ياجدك ) هي تضحك ووجها أحمر قلتلها اسمحيلي برك نحب نفرغ قلبي بصح ماكاش لي يفهمني قاتلي كي راني هنا احكيلي وماتخافش نفهمك (في قلبي لوكان تفهميني تحطي الاستقالة تاعك وتعتزلي التعليم)

وصل الليل وانا رحت قلبت على تمرين صعيب حطيتو وبقيت نستنا حتى فتحت الفيسبوك بعثتلها كلام عادي و صورتلها التمرين وتكسلت خليتها تحل براحتها بعثتلي الحل و بقات تفهم فيا قلتلها اذا نعستي اسمحيلي وروحي ترقدي (ماكنتش حاب نشوف عينيها متفخين صباح) قاتلي مزال الحال وفجأة خرجت من الموضع قلتلها دوختيني لازمني نشرب قهوة قاتلي ماعليش ريح شوية وغدوة نكملك انا فرحت ضرك يبدا اللعب تاع الصح قلتلها علابالي ديتلك بزاف من وقتك راكي تهتمي بيا أكثر من فارس أحلامك بعثتلي هاذيك الضحكة نتاع الهنودة وقاتلي ياريت يكون فارس أحلامي عاقل كيما نتا (قلتلها في قلبي عقلي لوكان ماراهش عندك تعرفي واش نكون ) قلتلها وانا راني متمني تون مرتي كيما أنت الله يبارك زين وعقل وضرافة يعني صوت وصورة وهي غير تضحك

كملنا السهرة ورحت نرقد كنت فرحان و صباح رحت نقرى و كيما العادة ستنيت الحصة نتاع الرياضيات و دخلت و كانت لعشية هههه قبل ما تدخل حليت فيسبوك لقيتها بعثتلي ميساج قاتلي ياستوت راني فالمكتبة نستني اذا تجي نفهمك بصح شفتو روطار هههه كي دخلت لعشية بقات تشوف فيا (قلتلها في قلبي خص غير تزيدي تكملي عليا اكتبي و خليني طرونكيل )كانت تشرح ومرة على مرة تشوف فيا وانا توسوست جبت تيلفون بعثتلها ميساج فالفايسبوك قلتلها عينيك ونتيا تشوفي فيا يفهموني الدرس قبل ما ندخل الحصة كي راحت قراتو المهبولة بدات تضحك وبدات تكتب وكي تكمل الشرح تخزر فيا وتقولي فهمت ولا نحل عينيا مليح قلتلها راني فاهم لوكان تكملي هاكذا ندي الباك بلا مانفوت...

المهم كملت وجيت خارج حكمني المراقب العام قالي عندك بزاف غيابات و تفوت مجلس تاديبي وممكن يفصلوك وهكذا كان الحال فصلوني وحسيت الحب ضاع بصح هي مسكينة دافعت عليا و هكذا ماحبوش يرجعوني وخلاص الفصل الاول بقيت نحكي معاها غير فالفايسبوك وصراحة توحشت نشوفها فالكلاصة ونشوف الوقفة نتاعها قريب هبلت بصح هي مانساتنيش وتفاهمنا نتلاقاو داخل الليسي و رحت عندها بقينا واقفين نقصرو وبزاف ناس يشوفو فينا وكانت الحكاية انتشرت فالليسي وصراولها مشاكل مع الادارة وانت فما كرهت حياتي ورحت للفيسبوك قلتلها اسمحيلي استاذة  ليوم راح نعيطلك باسمك اسمحيلي سناء ليوم نقولك نحبك و نعشقك و غلقت الفيسبوك ما حليتوش ليل كامل صباح كي نضت حليتو لقيتها انت تحبني وانا نموت عليك يا البهلول

من هذاك نهار ضربت 10 ايام ما شفتهاش حتى لقيتها بالخاتم شافت فيا و حطت راسها انا طاح مني النص رحت للدار و قعت نخمم وحدي و قررت نعاود نرجع نقرى و جبت الباك و بعثتلها باتيسري بصح ماشي 7ايتاج و زدت بلوكيتها مل فايسبوك و راني نحكي و ندمع