قصة احلام وعادل

• قصة احلام وعادل

احلام طفلة في عمرها 23 سنة تربات في عايلة محافظة جدا و للاسف ماكملتش قرايتها  و كانو عايلة شابحين بزاف على البنات كانت هي و ختها قل منها الي تزوجت



اهل كانو خايفين عليها جايتهم وصلت لعمر كبير و خايفين كيفاه مزوجتش و قالو الي يجي نقبلو بيه هي ديما كانت تحب تقرى و تخرج تشوف الدنيا  ♥ و هوما مايحابوش و يكرهوها كي عادت هكذا و يخافو يقولو تشوهلنا السمعة تعنا و مفرفجة هي كانت متربية و عادي بصح تحب تعيش



وحد النهار في عرس شافها واحد من العايلة اسمو عادل و كان قاري و ناس ملاح و كلش بعد و عندو المال عادي ساترو ربي ♥ ☺



مالا طلب يدها والديها قبلو و فرحو و قالو مادابينا نحيو الهم تعها على كتفنا



و بعد شهر .......







احلام ماكانش عندها مانع قالت المهم نتهنى من الدار و المشاكل و نعيش شوية و مادام راهو ناس ملاح مايهمش ☺



عدى 5 شهر و هوما يتعرفو امال عادي ماكانتش متعلقة بيه بزاف ولا بصح هو حبها بزاف بعد فترة تزوجو و كان عرسهم هبال و هو كان مداير كلشي  باش يرديها هي كانت فرحانة كي خرجت من الدار و ولات عندها دارها وحدها دير فيها واش تحب و و لات عندها حياتها خاصة و راجلها



اول حاجة دارتها طلبت منو شرط مايدخلش في لبستها هو طبعا يحبها و قابل بكلش و بدات تدي دوروس تتعلم فيهم اللغات الاجنبية لكن احلام ماكانتش مفرط في دارها و مدايرة بالها على راجلها و هو مرتاح و قاتلاتو الفرحة ♥



وحد النهار احلام تعرفت على نهى تعرفت عليها نت حصص الفرنسية بداو يدخاص على بعضاهم و نهى بدات تجيها لالدار



عادل ماعجباتوش قالها راهي باينة عيانة و متليقش غير اخطيك هي قاتلو لا لا صحبتي و مامنتها قالها خلاص ربي يسهل المهم ترتاحي



و هي قاتلو نتى يا عادل تضال تخدم و انا وحدي لازملي وحدة نحكي معاها و نعقب وقت معاها قنعاتو و سكت قالها ماعليس حبيبتي



و رى شهر هكذا جات عندها وحد النهار و قاتلها ........







نهى قاتلها نتي هكذا نهالا كامل ف الدار ماتقلقيش قاتلها احلام ياه واش نقلق درم نروح نشري حواشج الدار يجي عادل يديني ندور شوية



يا بنتي اني كي كنت في دارنا ماكنتش نحلم بهكذا قاتلها عندي ليك فكرة مليحة حنا رانا كل سمانة نرزحو بنات في بنات ل كافيتيريا و نقعدوا نقصرو ضحكت احلام و قاتلها تتمسخري بيا حنا عدنا كافيتيريا حاطتنا في لبنان



قاتلها نهى واش بيك يا بنتي نتي وين عايشة والله نخرجك نهار تنساي روحك قاتلها والله مانعرف نسقسي راجلي و نرجعلك الخبر



فالليل جا عادل و قاتلو قالها ماكلاه يا بنتي راهي واعرة هاذيك الطفلة  و نتي ماتعرفيش الناس ناضت قلقت و قاتلو واش حاطني صح ماكنتش نخرج في دارنا و شايفة الدنيا بصح منيش غبية و نتى حاطني راح تلعب عليا سكت هكذا مبعد قالها ماعليش دبري رايك المهم ديري بالك على روحك و اكي عارفة نحبك بصح نخاف عليك ♥



فرحة احلام و عيطت ل نهى قاتها قاتلها خلاص مالا الخميس الجاي نعدي عليك



الخميس عدات عليها نهى و راحو و داتها احلام فرحتها و زادت تعرفت على البنات هاذوك فجات دخل طفل عليهم و هدر معاهم هي حارت و بقات تشوف سلم عليهم و قعد احلام جبدت نهى قاتلها واش راهو يدير قاتلها واش بيك راهو حسام و يخدم معايا و رانا في بلاصة عامة ماتخافيش سكتت احلام بصح حسام بقى في القعدة اكل يشوف معاها و يتبسم و مبعد كي جاو نايدين حكمها من يدها .........



...............







احلام زعقت فيه و قاتلو نتا مهبول هو طلقها و ضحك و قالها واش اسمك برك هي راحت مشات و مبعد راحت عندو نهى قاتلو حاجة و رجعت قلقانة قالت لاحلام يا ختي اعرفي كيفاه تتصرفي و ماكيش صغيرة و انا مانيش مسؤولة سكتت احلام و قاتلها علاه فهمني مباعد نهى ضحكت و قاتلها والو والو هيا نروحو عندي حوايج نشريهم و نزيدو ندردشو شوية احلام سكتت و عقبت الموضوع و قاتلها بصح منحبوش يجمع معانا مرة اخرى قاتلها حاجة باينة مبعد روحت للدار و كي سقساها عادل ماقاتلو والو بقات غير تايهة و هو قالها انا اني عندي دمة سمانة هكذا ل العاصمة و نجي غدوة نسافر اليوم جيت بكري باش نعقبوه مع بعضانا ضحكت و عقبو يوم عادي الغدوة كي راح راحت لدارهم تزورهم يومين لقات ختها عندهم ف الدار مع التليفون قتلها واش راكي ديري قاتلها مع الفيسبوك قاتلها ييييه انا شحال عندي مافتفحتش شفت فايسبوك تاعي قاتلها هاكي مالا حليه شوي مالا هي فتحت و لقات انفيطاسيون تاع نهى و قبلتها مبعد قالت نروح نشوف بلاك نلقى فيس تاع وحدة من البنات نبعتلها مالا لقات الفيسبوك تاع حسام و عليه التصويرة تاعو و وحدها هكذا قتلها الفضول و بعتتلو انفيطاسيون



مالا الغدوة كي عادت فتحت لقاتو قبل مالا لقات ميساج ( اهلا احلام ماكونتش حاط في بالي نتي تبعتيلي ههههه المهم ياك لاباس )



هي حارت و قاتلو اني غلطت و راني حابة نسقسيك علاه درت هكاك هاذاك النهار قالها مادرت والو سقسيت على اسمك برك احلام سكتت و عقبتها و مبعد بدى هو يحكي معاها عادي و يقصر معاها و كلش هي



قالت واش فيها راهو صديق برك و غير فيسبوك



جاتها نهى و كي حكاتلها قاتلها واش بيك نتي مهبولة راكي مزوجة و انا الغالكة الي خرجتك و غير اخطيك احلام زادت كلاها الفضول و كملت تحكي معاه كل يوم



وحد النهار ..........







واحد النهار قاعدة تحكي معاه في الفيسبوك و طبعا هذا بعد مارجع راجلها و هو قاعد ينده فيها و متوحشها بعد سمانة ماشافهاش و هي لاهيا ب الفيسبوك و تحكي مع حسام مالا قالها



انا راني مخنوق و صراولي مشاكل فالدار و في الخدمة محتاج نفرغ قلبي لكاش واحد قاتلو اني هنا احكي قالها نقدر نعيكلم الاه يخليك و الله نحكي معاك برك و نحي الرقم تاعك



خممت هاكا مباعد قاتلو هيه عادي و هنا بدات تغلط احلام و ميش فايقة



و بلا ماتحس ولا كل يوم يعيطلها و نهى تحذر فيها و هي ميش سامعة مالا نهى جبدت يدها و مبقاتش تحكي معاها تسمى قاتلها عومي بحرك



وحد النهار راجلها خرج من الدار و حسام عيطلها و قالها راني تجت دارك انزليلي جبتلك حاجة ازربي ازربي هي نزلت عادي و حكمت عليه واحد الكادو هكذا و طلعت و مبعد كي جا راجلها و سقساها قاتلو جابتهولي نهى هو سكت بصح بدى يشك و يحس بيها تبعد عليه وحد النهار



جا لدار بكري و هو دخل سمعها تحكي في التليفون قدم بالشوية بالشوية سمعها قالت وا ان ثاني توحشتك واش بيك غالف الفيسبوك



عادل تصدم و ماعرفش واش يدير دخل طول عليها و ضربها و يبكي و يضرب فيها مبعد



قالها .........







قعد عادل يبكي و يقولها نتي يا احلام درت فيك الامان و الي بغيتيه يحضرك و كونتي تقوليلي نتا عينيا و كلش حبيتك من قلبي و عطيتك واش تبغي كنت نقول حرام عليا ولية تعذبت في دار بوها ميش انا نزيد نعذبها خليتك ديري لي وحدة فعايلتك لا داراتو



يا بنت الناس كون جيت راجل راني قتلتك درك بصح انا حبيتك صح و درك مانيش راجل على خاطر ماقدرت نديرلك والو وجعني قلبي



المهم نتي في طريق و انا في طريق مسح دموعو ووصلها لدار بوها



باباها كي سمع جاتو السكتة و طاح مسكين كيفاه انا بنتي لي ربيتها على طاعة الله تخون راجلها



وراها بيومين ختها رجعت لدار مطلقة راجلها قلها انا منديرش لامان في وحدة ختها خاينة و تعرف الرجالة على راجلها



شوفو قداه من حياة تدمرت بسبة هاذ الشي

الله يسترنا و يستركم جميعا يا رب